قراءه فى المشهد

 غير كتير من الناس عندى تفاؤل بسيط ان الغمه دى هتنزاح شواهد كتير بتدل على كده لو اعتبرنا ان من اسباب سقوط مرسى هو حرص الاخوان على الاستحواز وتهميش الآخر فدلوقت استحواز،قمع،قتل،استحمار شعب،بغباء شديد بيكسبوا عداء الناس وبيفقدوا تعاطف كتير من الناس اللى كانت معاهم،عندك موضوع زى التأمينات والتموين،مبدأ الشعب المصرى عض قلبى ولا تعض رغيفى سهل يخليهم يقلبوا عاليها واطيها،بس لحظه ده مش معناه رجوع مرسى،الامر ده دلوقت بقى محسوم بعد ما اتضح للجميع ان كل مؤسسات الدوله كانت بتعمل ضده وقطاع كبير رافض وجوده فهيكون سهل جداً يتنصب السرك تانى،وساعتها الله اعلم بالنتيجه المره اللى فاتت وصلنا لأنقلاب عسكرى بعد رجوعه هيحصل ايه؟ الله اعلم.
 

جوهر الموضوع مش مرسى،فالواجب على الاخوان هو السعى على التوافق مع القليل ممن يحكم المبادئ،بكده هيظهر بوضوح من يسير وراء مصالحه ومن يبحث عن مصلحه البلد،قولت الاخوان لأن هما الوحيدين اللى ف ايديهم يقدمو تنازل،وممكن اعتبار مبادره العوا اساس للتوافق،مش شرط تكون المبادره زى ما هى كده هى الحل،الشرط او الاساس ان يكون الحل موافق للدستور والقانون.

من غير احترام الدستور والقانون ملناش اى قيمه..

الانقلاب

  

 مشكله ما حدث فى 3 يولو كانت المبدأ -ان الجيش يتدخل ف اى حاجه حتى لو زي ما بيقولوا انحياز لأراده الشعب -،لو افترضنا جدلاً ان نظام مرسى مكانش ليه مؤيدين خالص ايضاً لا يصح تدخل الجيش ،الجيش مهمته حمايه البلد والانجرار لصراعات داخليه اياً كان شكلها لا يصح ،مفيش دوله محترمه فى العالم (دوله مؤسسات) بيحصل فيها كده،ولو الحجه ان الهدف من كده فى الصالح العام ،فالغايه لا تبرر الوسيله،مينفعش توصل لهدف سامى بأسلوب قذر.

  تركيا التمانينات كانت كل فتره يقوم انقلاب عسكرى وكان دايماً على جماعه اربكان(مجموعه حركات اسلاميه) مش فاكر الحقيقه اسم الحركه ايه حزبها الحالى هو حزب السعاده،المهم الفرق بين انقلاباتهم وانقلابنا ان الاول ممكن متقولش عليه انقلاب لأنه كان بيتم فى حدود الدستور اللى بيكفل للجيش التدخل لحمايه علمانيه الدوله ،اما انقلابنا اول الخطوات كانت تعطيل الدستور واقاله الرئيس (كل ده بالقوه) ،كل الخوف ان يكون انقلاب 3 يوليو سابقه خصوصاً انه لقى اللى يؤيد الاسلوب ده من التغيير.

  فى تركيا بعد كتييير من الانقلابات خرج من حركه اربكان مجموعه منهم اردوغان،المجموعه دى كان ليها فكر مختلف بعض الشيئ عن اربكان،مشكله حركه اربكان انها كانت ولازالت قافله على نفسها مثلاً مكانش مسموح لحد من خارج الحركه انه ينضم لحزبها وكانت بتفرض على اعضائها اساليب معينه فى حياتهم وده اللى كان بينفر منه الاتراك وخلاها غير مقبوله غير من شريحه محدوده من الشعب التركى،لما مسك اردوغان امانه الحزب فى اسطنبول غير من الاسلوب ده مثلاً كان اول مره تصل الدعايا الانتخابيه للحزب لداخل الخمارات فى تركيا وده اللى خلى قياده الحزب تحاول تقصيه من اسطنبول لولا انهم رأوا النجاح اللى حققه ،بعدها انفصل اردوغان بمجموعته وكونوا حزب العداله والتنميه ،كانت غلطه حركه اربكان انها كانت بتخالف الدستور العلمانى وده كان بيسمح بالانقلابات العسكريه، فى حزب اردوغان تلافى الاخطاء دى وفتح الحزب لكل الطوائف حتى انه سمح لغير المحجبات لأول مره بالدعايه الانتخابيه واتهاجم على كده كتير بس ف الاخر نجح ووصل لرئاسه الوزراء وبسبب احتكاك حزبه بباقى الاحزاب وعدم السعى على السيطره على كل شيئ نقلت حكومته تركيا من بلد مليئ بالمشاكل دائم الانقلابات مليئ بالفساد اكتر من اللى احنا فيه 100 مره للى احنا شايفينه دلوقت وف 2010 بعد 6 سنوات من توليه رئاسه الوزراء عمل تعديلات دستوريه ووافق عليها الشعب وشال بيها اى امكانيه لأى انقلاب عسكرى.

  غلطه الاخوان انهم كانوا بيعتمدوا على اهل الثقه بغض النظر عن الكفاءه وده اللى خلى وزارتهم تفشل وزادت معارضه الناس ليهم ونزلوا للشارع وهو اللى ساعد ع الانقلاب، حاجه قريبه من اخطاء حركه اربكان،المشكله بئا ان اخطاءهم دى مش معترفين بيها وبيرموا كل حاجه على المعارضه والانقلاب رغم انهم ف الحقيقه ساعدوا على انجاح الانقلاب باخطائهم،تخيل لو ان المشكله اتمنعت من المنبع بمعنى ان الاخوان لو كانوا تلافوا مشاكل كتير زى الدستور ومشروع التمكين وغيرها مكانش السيسى هيلاقى الغطاء الشعبى اللى ساعد فى نجاح الانقلاب.

 
 لسه فى فرصه للخروج ببعض المكاسب فى حاله ان يتنازل الاخوان عن عوده مرسى،فى الحاله دى هتتحول المطالب من الطابع الفئوى اللى وخداه لمطلب عام فعلاً وهو اللى هيعمل نتائج افضل من اللى وصلنا ليه.